Leħen il-Karmelitani jxandar minn studjo mgħammar b’teknoloġija avvanzata għall-aħħar, programmi varji ta’ mużika ta’ ġeneri diversi inklużi programmi ta’ marċi lokali, programmi b’temi reliġjużi u programmi bil-għan li jedukaw lis-semmiegħa dejjem aktar fuq l-istorja ta’ pajjiżna u l-folklor Malti fost oħrajn. Ma jonqsux lanqas, programmi b’intervisti ma personalitajiet Maltin, radju-drammi u ħafna aktar.

Għal dawn l-aħħar snin, Radju Leħen il-Karmelitani, xandar ukoll fix-xaħar tal-Milied b'għan filantropiku - dak li jinġabru fondi għal-fondazzjonijiet ta’ karita'. Flimkien ma' kummissjonijiet oħra fi ħdan l-Għaqda Karmelitana Banda Queen Victoria Żurrieq, għal tliet ijiem mix-xandir, ir-radju jorganizza maratona ta’ ġbir ta’ fondi taħt it-tinda f’Misraħ ir-Repubblika fejn jittellgħu ħafna avvenimenti ta’ divertiment u spettaklu bl-għan li jinġabru aktar fondi. Fl-aħħar, ir-radju jagħlaq din it-trasmissjoni tiegħu ta' minn taħt it-tinda billi jgħaddi l-fondi miġbura lill-fondazzjoni magħżula biex tibbenefika minnhom.